Deputetja e Partisë Demokratike, Ina Zhupa, ka bërë të ditur sot se seanca gjyqësore e ardhshme për çështjen e Butrintit do të mbahet më 21 mars, në orën 10:00, dhe se do të fokusohet vetëm në raportin e UNESCO-s. Në një intervistë në një program televiziv, Zhupa shprehu shpresën se Gjykata Kushtetuese do të përmbushë detyrën e saj. Ajo shtoi se në qoftë se gjykata nuk do të ruajë interesin publik në këtë çështje, nuk do të ketë më nevojë për të.
“Me kërkesën që i drejtuan GJK, e pranuan, kanë administruar raportin e UNESCO. Po e them ekskluzivisht këtu në studion tuaj se seanca e radhës për Butrintin do të jetë më 21 mars, në orën 10:00 që do të jetë seancë vetëm për raportin e UNESCO.
Publiku nëpërmjet Amerikës është njohur se raporti i UNESCO ishte kundër Adf, kundër marrëveshjes së koncesionit dhe u fsheh. E dinin që duke dalë raporti i UNESCO nuk kishin asnjë justifikim.
Nga GJK nuk pres asgjë më shumë që të bëjë detyrën e saj. Nëse nuk arrin për një çështje të tillë, identitete dhe historike, jo politike, të ruajë interesin publik dhe kushtetutshmërinë, për mua GJK nuk ka më. Sot GJK e ka të gjithë materialin për të parë 18 shkelje, me materiale të evidentuara dhe të sakta. Nuk besoj se nuk ka ndonjë rrugëdalje për të shmangur vendosjen e kushtetutshmërisë”, tha Zhupa.
