Në tre pikat kufitare të vendit, policia ka vënë në pranga katër persona dhe një tjetër është ndjekur penalisht për vepra të ndryshme penale.
Në Morinë, shtetasi kosovar i shpallur në kërkim ndërkombëtar, Jeton Dervishaj, 38 vjeç, u ndalua. Ai është dënuar me 2 vjet burgim në Hungari për kalim të kundërligjshëm emigrantësh dhe në Serbi ka urdhër arresti për të njëjtën veprimtari kriminale. Interpol Tirana po punon për ekstradimin e tij.
Në një dalje tjetër, u arrestuan në flagrancë shtetasit kosovarë A. M., 26 vjeç dhe L. C., 23 vjeç, për shkak të dy pasaportave të dyshuara se janë të falsifikuara. Dy dokumentet u sekuestruan si provë materiale.
Në hyrje të vendit, u ndalua Hasan Gatali (Qazimi), 40 vjeç, i cili është dënuar me 9 muaj burgim nga Gjykata e Tiranës për veprën penale “Kontrabanda me mallra me regjim të ndërmjetëm”.
Në Portin e Durrësit, materialet u dorëzuan në Prokurori për shtetasin kosovar Rr. I., 54 vjeç, pasi në automjetin e tij u gjetën dhe u sekuestruan rreth 17,000 euro pa deklaruar sipas ligjit. Prokuroria po bën procedurat e mëtejshme për këtë rast.
