Numri i meshkujve në raport me femrat po bie me ritme alarmante në Shqipëri.
Sipas të dhënave të INSTAT-it, më 1 janar 2023, numri i meshkujve kishte zvogëluar për 71,6 mijë krahasuar me vitin 2018, ndërsa numri i femrave ishte zvogëluar për 36,8 mijë në të njëjtën periudhë. Një analizë e thelluar nga një artikull në revistën Monitor tregon se edhe pse lindjet në Shqipëri favorizojnë djemtë me një raport prej 105 djem për 100 vajza, emigracioni i lartë i meshkujve dhe jetëgjatësia më e ulët e tyre janë dy faktorët kryesorë që po sjellin këtë shkallëzim të zvogëlimit të popullsisë së burrave.
Rënia më e madhe e popullsisë së meshkujve prej vitit 2018 është regjistruar në qarkun e Gjirokastrës, me një zvogëlim prej 18%, ndërsa në vendin e dytë është Berati me një zvogëlim prej 15%. Vetëm Tirana ka shënuar një rritje të numrit të meshkujve me 4% gjatë periudhës 2018-2023, kryesisht për shkak të tendencës së zhvendosjeve nga qarqet drejt kryeqytetit, ndërkohë që emigracioni jashtë vendit ka vazhduar të jetë në nivele të larta në vitet e fundit.
