Hamas dhe delegacioni i tyre kanë tërhequr pjesëmarrjen nga bisedimet për armëpushim në Gaza në Kajro, pa arritur ndonjë shenjë përparimi disa ditë para fillimit të muajit të Ramazanit.
Shtetet e Bashkuara kanë akuzuar grupin militant palestinez për dështimin në arritjen e një marrëveshjeje me Izraelin për armëpushim. Në anën tjetër, Izraeli dhe Hamas kanë fajësuar njëri-tjetrin për mungesën e një marrëveshjeje pas katër ditëve të bisedimeve të ndërmjetësuara nga Katari dhe Egjipti për një armëpushim 40-ditor, duke pasur frikë se tensionet mund të përshkalloheshin gjatë muajit të Ramazanit.
Izraeli ka deklaruar se qëllimi i tyre është të shkatërrojnë Hamasin dhe se çdo armëpushim duhet të jetë i përkohshëm. Ata kanë kërkuar gjithashtu një listë të pengjeve ende të gjallë dhe të mbajtur nga Hamasi në Gaza.
Hamas thotë se përmbushja e kërkesave izraelite është e pamundur pa një armëpushim. Ata thonë se pengjet janë të shpërndarë në të gjithë zonën e konfliktit, dhe raportojnë se një raund i ri i bisedimeve mund të mbahet javën e ardhshme.
Një zyrtar i lartë i Hamasit ka bërë të ditur se Izraeli po refuzon kërkesat për të ndaluar ofensivën e tyre në enklavën e Gazës, për të tërhequr trupat e tyre dhe për të siguruar lirinë e hyrjes për ndihma dhe për kthimin e të zhvendosurve. Qeveria izraelite nuk ka dërguar një delegacion në këto bisedime të fundit, ku përfaqësuesit nga Hamasi, Katari dhe Egjipti kanë tentuar të arrijnë një armëpushim 40-ditor.
Ndërkaq, si pasojë e gjendjes së vështirë dhe krizës së urisë në Gaza, Sekretari i Jashtëm David Cameron ka konfirmuar se Britania e Madhe do të bashkohet me SHBA-në në hapjen e një “korridori detar” për të ofruar ndihmë në Gaza. Presidentja e Komisionit Europian, Ursula von der Leyen, gjatë një vizite në Qipro, ka deklaruar se Evropa po financon një përpjekje të madhe për ndihmë humanitare për palestinezët.
Von der Leyen në Qipro ka inspektuar objektet në portin e Larnaka, që është identifikuar si një pikë nisjeje për dërgesat e ndihmave nga deti në Rripin e Gazës. Qiproja ka ofruar përdorimin e portit të saj për këtë qëllim, pasi është shteti më i afërt i Bashkimit Evropian me rajonin. OKB-ja ka theksuar se dërgesat nga deti nuk janë zëvendësim për dërgesat tokësore, të cilat mund të sjellin ndihma më të shpejta për njerëzit.
