Festivali spanjoll në qytetin e Valencias përfundoi të martën në mbrëmje, duke shënuar mbylljen e qindra fishekzjarreve dhe skulpturave të ngjashme me kukullat “Fallas” që digjeshin.
Ky festival, i shpallur trashëgimi jomateriale e njerëzimit nga UNESCO, simbolizon largimin e dimrit dhe ardhjen e pranverës. Monumentet e mëdha që përfaqësojnë qenie të ndryshme, reale dhe imagjinare, qëndrojnë në rrugë për disa ditë para se të digjen në fund të festës.
Gjatë këtyre ditëve të festivalit, qyteti përjeton gjallërim me muzikë, fishekzjarre dhe, natyrisht, me konsum të madh alkooli.
Konsiderohet që festivali ka origjinën në shekullin e 19-të, kur marangozët e qytetit mbledhën drurët e mbetur nga punishtet për t’i djegur në ditën e Shën Jozefit, shenjtit mbrojtës të tyre.
Me kalimin e kohës, këto konstruktime u bënë gjithnjë e më komplekse, duke u shndërruar në një shfaqje të madhe të artit të rrugës. Artistët vendas shfaqën krijime të tyre, duke u bazuar në tema specifike dhe duke shprehur shpesh çështje sociale dhe politike të aktualitetit. Duke ecë nëpër rrugët e Valencias gjatë ditëve të festivalit, vizitorët mund të shohin skulptura me mesazhe për çështje të diskutueshme ose që bëjnë parodi të politikanëve të njohur.
