Zgjedhjet lokale të së dielës në Turqi janë vlerësuar si një “disfatë” për presidentin Rexhep Taip Erdogan dhe partinë e tij. Opozita republikane jo vetëm që ka mbajtur kontrollin e qyteteve të mëdha që i kishte fituar që nga viti 2019, por ka arritur të fitojë edhe shumë qytete të tjera.
Kryebashkiaku i Stambollit, Ekrem Imamollu, i cili po shihet gjithnjë e më shumë si lider tek republikanët laikë në opozitë, u rizgjodh me mbi 50% të votave, 11% më shumë se rivali i tij nga partia e Erdoganit.
Në Ankara, kryebashkiaku republikan Mansur Javash u rizgjodh me një mbështetje edhe më të fortë, duke fituar me 60% të votave, në krahasim me rivalin e tij nga partia në pushtet. Partia e themeluar nga Ataturku, për më tepër, mori qytetin e katërt më të madh, Bursën, dhe ruajti kontrollin në Izmir, Adana dhe Antalja.
Harta e rezultateve të zgjedhjeve në mediat turke tregon se republikanët kanë përhapur shtrirjen e tyre në shumë prej zonave që ishin nën kontrollin e partisë së Erdoganit në zgjedhjet lokale të pesë viteve më parë. Për kryebashkiakun e Stambollit, këto zgjedhje tregojnë fundin e sundimit të një individi të vetëm. Ndërkohë, presidenti pranoi humbjen dhe tha se ishte koha për reflektim në partinë e tij.
Analistët besojnë se fitoreja në këto zgjedhje mund të japë një arsye të fortë për Erdoganin për të zgjatur sundimin e tij përtej vitit 2028, kur përfundon mandati presidencial. Shumë qytete në juglindje u fituan nga Partia e Popullit për Barazi dhe Demokraci, e cila ka mbledhur përfaqësuesit e kurdëve rreth saj.