Mesfushori i Kombëtares Shqiptare, Kristjan Asllani, ka thyer më në fund mallkimin dhe ka shënuar golin e parë me fanellën e Interit në kampionatin italian.
Në ndeshjen kundër Xhenoas, e cila u fitua me rezultatin 2-1, Asllani shënoi golin e parë për zikaltërit në minutën e 31-të të ndeshjes.
Golin e shënoi pas një pasimi të Sançez në zonë, duke treguar precizion në goditjen e rrjetës.
Kjo ishte ndeshja e 36-të në kampionatin italian dhe ndeshja e 53-të në total si lojtar i Interit. Golin e fundit në kampionatin italian, Asllani e kishte shënuar kur ishte lojtar i Empolit dhe pikërisht kundër Interit.
Asllani është titullar për herë të tretë radhazi në ndeshje, treguar që trajneri Inzagi ka besim te talenti i tij. Pas kësaj fitore, Interi shkëputet ndjeshëm, duke u vendosur 15 pikë larg Juventusit, vendit të dytë në renditje.
