Pas një periudhe rënje në muajt Janar-Shkurt, besimi në ekonominë e Shqipërisë ka treguar shenja të përmirësimit në Mars. Banka e Shqipërisë ka bërë të ditur se Treguesi i Ndjesisë Ekonomike ka shënuar një rritje prej 2.5 pikë në muajin e kaluar, me ndikim pozitiv nga sektorët e industrisë, tregtisë dhe shërbimeve, si dhe nga rritja e besimit të konsumatorëve.
Në raportin e fundit të Bankës së Shqipërisë për Marsin, treguesi i besimit të industrisë u rrit me 3.6%, duke e çuar nivelin aktual 3.5% mbi mesataren historike. Kjo rritje u ndikua nga vlerësimet pozitive të bizneseve për prodhimin industrial aktual dhe pritjet më optimiste për porositë nga eksportet në të ardhmen.
Treguesi i besimit në sektorin e shërbimeve u rrit me 6.4% në Mars dhe aktualisht qëndron në 12.3 pikë përqindje mbi mesataren historike. Kjo rritje u shoqërua nga vlerësimet më optimiste të bizneseve për ecurinë e aktivitetit të tyre dhe nivelin aktual të kërkesës, duke përfshirë edhe flukset turistike.
Treguesi i besimit në sektorin e tregtisë gjithashtu rikuperoi në Mars, duke shënuar një rritje prej 2.7%, duke neutralizuar rënien e muajve Janar dhe Shkurt. Vlerësimet më optimiste të bizneseve dhe sektori i turizmit kanë qenë faktorë kryesorë në këtë rritje mujore.
Treguesi i besimit të konsumatorëve gjithashtu shënoi një rritje prej 1.4 pikë përqindje në Mars, duke u ngritur sërish mbi nivelin e mesatares historike. Konsumatorët vlerësuan përmirësimin e situatës financiare dhe ekonomike të vendit pozitivisht, gjë që çoi në rritjen e besimit të tyre.
