Duke filluar nga sezoni i ardhshëm, futbollistët me pasaportë shqiptare do të luajnë në kampionatin italian si të barabartë dhe pa u konsideruar si lojtarë ekstrakomunitarë.
Kjo marrëveshje është arritur mes Federatës Shqiptare të Futbollit dhe Federatës Italiane të Futbollit, duke i dhënë futbollistëve shqiptarë më shumë të drejta dhe mundësi në futbollin italian.
Presidenti i FSHF, Armand Duka, ka ndjekur këtë çështje në bisedat e tij me Presidentin e Federatës Italiane, Gabriele Gravina, duke synuar një marrëveshje të tillë.
Ky vendim ka potencialin për të inkurajuar talente të reja shqiptare dhe për t’i dhënë atyre mundësinë për të konkurruar në një nivel të lartë në Seria A dhe në divizionet e tjera italiane.
Në fakt, Seria A dhe ligat e tjera italiane kanë pasur një prezencë të rëndësishme të futbollistëve shqiptarë në ekipet e tyre. Vetëm duke u referuar listës së fundit të thirrur nga trajneri Sylvinho, prej tyre 26, 8 futbollistë luajnë në elitën italiane të futbollit.
