Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka konfiskuar pasuritë e pajustifikuara në pronësi të prindërve të dy shtetasve, R.D. dhe Gj.D., në kuadër të ligjit nr. 10192 “Për parandalimin dhe goditjen e krimit të organizuar, trafikimit, korrupsionit dhe krimeve të tjera nëpërmjet masave kundër pasurisë”.
Nga analiza financiare, rezultoi se shtetasit nën hetim nuk kanë pasur mundësi të justifikojnë burimin e pasurive të tyre, të cilat kanë shërbyer si burim për investime në blerjen e pasurive të paluajtshme. Gjykata pranoi kërkesën e prokurorisë dhe me vendimin e datës 13.03.2024 vendosi konfiskimin e pronave të mëposhtme:
– Apartament me sipërfaqe 103.20 m2 në rrugën Aleksandër Moisiu, Tiranë;
– Apartament me sipërfaqe 100 m2 në rrugën Aleksandër Moisiu, Tiranë;
– Garazh me sipërfaqe 17.20 m2 në rrugën Aleksandër Moisiu, Tiranë; dhe
– Garazh me sipërfaqe 17.40 m2 në rrugën Aleksandër Moisiu, Tiranë.
Pasuritë e mësipërme u konfiskuan dhe u kaluan në pronësi të shtetit pasi, sipas hetimit të kryer, rezultoi se djemtë e tyre, shtetasit V.D. dhe S.D., janë përfshirë në aktivitetin kriminal të trafikimit të narkotikëve në bashkëpunim, veprë penale e kryer jashtë shtetit (Angli).
Pasuritë e mësipërme janë akumuluar gjatë dhe pas periudhës së aktivitetit kriminal, dhe vlera e tyre nuk korrespondon me nivelin e të ardhurave dhe fitimeve të deklaruara ligjshëm, dhe as nuk është justifikuar prej tyre.
