Një përfaqësi e zgjedhur nga krahinat e komunave arbëreshe, me ftesë të Presidentit të Republikës së Shqipërisë, Bajram Begaj, do të bashkohet në festimet e 580-vjetorit të Besëlidhjes së Lezhës.
Presidenti Bajram Begaj pritet të presë një delegacion të gjerë arbëreshësh nga Italia, të cilët do të organizojnë një vizitë të veçantë në Shqipëri për të festuar këtë ngjarje historike.
Delegacioni përfshin drejtues të krahinave dhe komunave arbëreshe, si dhe aktivistë, gazetarë dhe përfaqësues të shoqatave që kontribuojnë për komunitetin arbëresh në marrëdhëniet me Shqipërinë.
Pritja zyrtare e arbëreshëve do të zhvillohet në Institucionin e Presidencës më datën 2 Mars në orën 07:30. Më pas, Presidenti Begaj dhe delegacioni do të udhëtojnë drejt Lezhës.
Festimet për 580-vjetorin e Besëlidhjes së Lezhës fillon në orën 10:30 me ngritjen e Flamurit tek Obelisku i Besëlidhjes së Lezhës dhe vazhdon me vizitën në Panairin e Trashëgimisë Kulturore. Ceremonia zyrtare do të mbahet në Pallatin e Kulturës në Lezhë, ku Presidenti Begaj pritet të adresojë fjalën e tij për të pranishmit.
