Në dy muajt e parë të vitit, Shqipëria ka shënuar një përparim të dukshëm në numrin e turistëve krahasuar me vitin e kaluar.
Deri në shkurt, numri i vizitorëve ka shkuar në 1 milion, duke treguar një rritje prej 33% krahasuar me të njëjtën periudhë një vit më parë. Një aspekt i rëndësishëm që është përmendur është ardhja e një numri gjithnjë e më të madh të turistëve me të ardhura më të larta.
Shifrat tregojnë se ka një rritje të konsiderueshme të numrit të vizitorëve nga Evropa Perëndimore dhe Evropa Veriore, përfshirë vendet skandinave, të cilat kanë një nivel të lartë të pagave.
Në vitin 2023, numri i turistëve nga Suedia, Norvegjia dhe Finlanda ishte 109 mijë, me një rritje prej 76%. Një përfaqësues i biznesit nordik shprehet se interesimi i skandinavëve për Shqipërinë është në rritje.
Bujar Zhuri, përfaqësues i “Grupi i Bizneseve Nordike”, thekson se hapja e Shqipërisë ka tërhequr vëmendjen e tyre për një vend me natyrë të bukur dhe një diversitet të madh kulturor.
Të gjitha këto faktorë parashikojnë një rritje të ndjeshme jo vetëm në turizëm, por edhe në investime nga Skandinavia.
Shqipëria ka qenë subjekt i promovimit në evente të rëndësishme turistike si Panairi i Turizmit në Berlin dhe ka qenë prezente në konferenca të rëndësishme botërore. Mediat europiane kanë promovuar gjithashtu turizmin në Shqipëri, duke e bërë të njohur edhe më gjerësisht në Evropë.
